“Qarabağ”ın futbolçusu Rahil Məmmədov yeni transfer olunduğu Polşanın LKS klubuna yanvar ayının 20-də qoşulacaq.

Pressing.az xəbər verir ki, bu barədə “gol24.pl” saytı məlumat yayıb.

28 yaşlı müdafiəçi həmin gün Türkiyəyə yollanacaq. O, Side bölgəsində təlim-məşq toplanışı keçəcək yüksək liqa təmsilçisinin heyətində mövsümün ikinci yarısına hazırlaşacaq. Lodz komandası orada 4 yoxlama matçında qüvvəsini sınayacaq.

LKS Polşa Ekstraklasasının birinci dövrəsindən sonra 10 xalla axırıncı pillədə qərarlaşıb. Pyotr Stokovieçin baş məşqçisi olduğu komanda 2024-cü ildə ilk oyununu fevralın 12-də keçirəcək. LKS həmin gün 20-ci tur çərçivəsində “Korona”nın qonağı olacaq.

Qeyd edək ki, Məmmədovun Polşa klubuna keçidi ilə bağlı xəbəri eksklüziv olaraq saytımız yazıb.