"Sabah"ın kapitanı Elvin Camalov Premyer Liqanın 18-ci turunun "Qəbələ" ilə matçından sonra Pressing.az saytına müsahibə verib:

- Meydanda başa-baş mübarizə getdi. Bu gün şans "Qələbə"nin tərəfində idi. Penaltidən də yararlana bilmədik. Ən azından buradan 1 xalla ayrıla bilərdik. Məncə, bu gün bəxt bizim tərəfimizdə deyildi.

- Mövsümün ilk yarısını necə dəyərləndirirsən?

- Ötən mövsümlə çox müqayisə etmək istəməzdim. Hazırda qeyri-stabil çıxış edirik. Stabilliyi qoruyub-saxlaya bilmirik. Bunun ciddi bir səbəbi yoxdur. Oyunlara çox ciddi hazırlaşırıq. Sadəcə alınmır, bəxt yanımızda olmur. Komandanın daxilində hər şey qaydasındadır.

- Meydana daxil olandan sonra kapitanlıq bazübəndini niyə götürmədin?

- Aleksey İsayevin yadından çıxmışdı. Sonra dedi ki, götür. Mən də dedim ki, bazübəndin kimdə olmağının fərqi yoxdur, ikimiz də komandanın əsas oyunçusuyuq.

- Meydandan çıxanda azarkeşlər tərəfə baxdın və dayandın. Həmin an nə düşünürdün?

- İstədim ki, onların yanına gedim. Uduzmuşuq, üzüm olmadı o tərəfə getməyə. Bizdən ötrü uzun yol qət etmişdilər. Buradan təşəkkürümü bildirirəm onlara. İnsan uduzanda utanır onların qarşısına çıxmağa. Yenə də gedib təşəkkür etmək borcumuzdur.

Elsəvər Muradzadə/Bakı-Qəbələ