“Sabah”ın akademiya inqilabı – YAZI

“Sabah” artıq təkcə əsas komandasının nəticələri ilə deyil, akademiyasının uğurları ilə də diqqət çəkir. Daha əvvəl U-16 komandası AFFA Liqasının qalibi olmuşdusa, bu dəfə U-14 yaş qrupu çempionluğu "Bayquşlar"ın aşağı yaş kateqoriyalarında da sistemli və planlı işlədiyini göstərdi.

Bu uğurlar təsadüf deyil. Klubun akademiyasında uzunmüddətli inkişaf proqramı, müasir futbol yanaşması və gələcəyə hesablanmış strategiya formalaşdırılıb. Görünən budur ki, Masazır təmsilçisi futbolçuların həm texniki, həm taktiki, həm də psixoloji inkişafına xüsusi diqqət ayrılır.

Ən önəmlisi isə odur ki, “Sabah” akademiyası nəticəni yalnız bu gün üçün yox, gələcək üçün qurur. Bu sistem davamlı şəkildə işlədiyi halda, yaxın 5-10 ildə Azərbaycan futboluna çoxsaylı keyfiyyətli və istedadlı futbolçular qazandıracağına şübhə doğurmur.

Azərbaycan futbolunda infrastruktur, yanaşma və inkişaf modeli baxımından fərq yaradan akademiyalardan biri məhz “Sabah”dır.

Orxan İsmayılov