"Şəfa" Vüsal İsgəndərlini transfer etməyə yaxındır – ÖZƏL

1-ci Liqanın lideri, Premyer Liqaya yüksəlməyə namizəd olan "Şəfa" heyətini yeni futbolçuyla gücləndirməyə hazırlaşır.

Pressing.az-a daxil olan informasiyaya görə, paytaxt təmsilçisi Azərbaycan millisinin və Albaniyanın "Partizani" klubunun cinah yarımmüdafiəçisi Vüsal İsgəndərli ilə danışıq aparır.

30 yaşlı futbolçunu "Şəfa"ya təklif edən menecer Adil Mirzəzadə də əməkdaşımızla söhbətində məsələni təsdiqləyib. Mirzəzadənin sözlərinə görə, klubun növbəti mövsüm üçün büdcəsi təsdiqləndikdən sonra tərəflər arasında danışıqlar yenidən davam edəcək.

"Şəfa"nın baş məşqçisi Elgiz Kərəmli də Vüsal İsgəndərlini sərəncamında görmək istəyir.

Bildirək ki, V.İsgəndərlinin Albaniya klubu ilə müqaviləsinin müddəti bu ilin iyununda başa çatır.

Orxan İsmayılov