Ötən gün axşam AFFA Hakimlər Komitəsinin sabiq sədri, İdman TV-nin eksperti Xaqani Məmmədov dövlət televiziyasında canlı yayımlanan "Futbol Var" verilişində yenə əndazədən çıxıb.

Bu dəfə Xaqani Məmmədov qadın yan xətt hakimi, FİFA dərəcəli laysman Sevda Nuriyevaya qarşı peşəsinə münasibətdə cinsiyyətə əsaslanan ayrı-seçkilik ifadələri işlədib. Bu cür münasibət cəmiyyətdə hüququn aliliyi və bərabərliyi, həmçinin gender bərabərliyi prinsiplərinə ziddir.

Belə çıxışlar Azərbaycan Respublikasının Konstitusiyasının (xüsusilə 25-ci maddənin) müddəalarını, həmçinin “Gender bərabərliyinin təminatları haqqında” Qanunun əsas prinsiplərini pozur.

Səsləndirilən fikirlər qadınlara qarşı aşağılayıcı və diskriminasiyaedici mahiyyət daşıyır. Bu tip ifadələr nifrət çıxışı kimi qiymətləndirilə bilər və cəmiyyətdə qadınlara qarşı mənfi stereotipləri gücləndirməklə, nifrət zəminində ayrı-seçkiliyə yol aça bilər.

Eyni zamanda, bu cür fikirlər peşə etikası baxımından da qəbuledilməzdir. Futbol şərhçisi, xüsusilə də keçmiş Hakimlər Komitəsinin sədri kimi, obyektiv və hörmətli davranış sərgiləməlidir. Onun ictimai yayımda səsləndirdiyi fikirlər cəmiyyət qarşısında daşıdığı məsuliyyətə uyğun gəlmir və media etikasına ziddir.

Elsevər Muradzadə