Bəhram Bağırzadə "Neftçi"də işləməyinə PEŞMANDIR: "Özümə nifrət edirdim" – VİDEO

"Bir dəfə böyük səhv etdim, "Neftçi" Futbol Klubunda işlədim".

Pressing.az xəbər verir ki, bu sözləri "Neftçi"nin Müşahidə Şurasının üzvü olmuş Azərbaycan aktyoru, şoumen Bəhram Bağırzadə deyib.

O, ATV telekanalında yayımlanan "Efirdən kənar" verilişində paytaxt təmsilçisində işlədiyi vaxtları xatırlayıb. B.Bağırzadə "Neftçi"də çalışdığı üçün peşman olduğunu bildirib:

"Özümə ən çox nifrət etdiyim günlər idi. Orada güclü kollektiv var idi. Məsələn, Çingiz Abdullayev...

Deyirdilər ki, sənin futboldan anlayışın yoxdur, ora nəyə görə getmisən? Deyirəm ki, qardaş, orada masajçılar da var, həkimlər də. Onların da futboldan başları çıxmır. Öz funksiyalarını yerinə yetirirlər. Mənim funksiyam isə piar idi. Yəni, mən elə bir ab-hava yaratmalı idim ki, məsələn, İlyas azarkeş olmasa da, desin ki, bu gün "Neftçi" "Qarabağ"la oynayır, gedək baxaq. Mənim işim azarkeşləri, tamaşaçıları stadiona dəvət etmək idi. Bu (“Neftçi”də işləmək - red.) mənim ən böyük axmaqlığım idi. Müəyyən səbəblərə görə indiyədək özümə nifrət edirəm ki, niyə "Neftçi"də çalışmışam".

Xatırladaq ki, B.Bağırzadə 2015-2016-cı illərdə “Neftçi”nin Müşahidə Şurasının üzvü olub.