Aqil Nəbiyev: "Yayılan xəbərlər həqiqəti əks etdirmir" – AÇIQLAMA

Ötən gün yerli mətbuatda Azərbaycanın U-15, U-16 və U-17 milli komandalarının baş məşqçisi Aqil Nəbiyevin UEFA Pro lisenziyası məşqçi kurslarında imtahandan kəsildiyi barədə məlumatlar yayılıb.

Belə ki, gənc mütəxəssisin kursu uğurla başa vura bilmədiyi üçün UEFA Pro kateqoriyasına yiyələnə bilmədiyi qeyd olunub.

Məsələ ilə bağlı Aqil Nəbiyevlə əlaqə saxladıq. O, Pressing.az-a açıqlamasında yayılan xəbərlərin həqiqətə uyğun olmadığını bildirdi:

"Yayılan xəbərlər həqiqəti əks etdirmir. Ümumiyyətlə, son illərdə Pro kateqoriya imtahanından kimi kəsiblər? Bəli, hansısa çatışmazlıqlar mövcud ola bilər və onları aradan qaldırdıqdan sonra yenidən Pro kateqoriyasına yiyələnə bilərsən. 15, ya 20 gündən sonra yenə də həmin kateqoriyanı almaq mümkündür. Məsələn, mən ötən il 3 yaş qrupu üzrə milli komandaların baş məşqçisi olmuşam. Ola bilər ki, hansısa platformalarda çatışmazlıqlar olsun və bunları aradan qaldırdıqdan sonra "Pro"nu almaq olar. Yəni burada kəsilmək deyə bir şey yoxdur".

Pressing.az