“Yaxşı bilirik ki, bizi doğma meydanda "Kəpəz"lə ağır oyun gözləyir. Çalışacağıq ki, yalnız qələbə qazanaq”.

Bu sözləri "Sumqayıt" klubunun yarımmüdafiəçisi Vüqar Mustafayev Pressing.az-a açıqlamasında deyib.

28 yaşlı futbolçu yaxşı nəticəyə inandığını vurğulayıb: “Ötən tur səfərdə "Qəbələ"yə məğlub olduq. Bizi qarşıda daha ciddi sınaq gözləyir. "Kəpəz" son oyundakı qələbədən sonra uğurlu çıxışının ardını gətirmək istəyəcək. "Kəpəz"in ümumiyyətlə yaxşı kollektivi var, əzmkar komandadır. Buna rəğmən, biz də qarşılaşmaya çox ciddi hazırlaşırıq. Komanda şəklində məşqlərdə var gücümüzlə çalışırıq. Əsas da turnir cədvəlindəki yerimizi möhkəmləndirməyimiz vacibdir”.

Təcrübəli futbolçu azarkeşləri sevindirmək üçün əllərindən gələni edəcəklərini bildirib: “Məqsəd yalnız qələbədir. Bildiyiniz kimi, bu cür qarşılamalar həmişə çətin keçir. Azarkeşlərimiz də həmişə yüksək səviyyədə bizə dəstək olurlar, tribunalarda demək olar boş yer qalmır. Bu, bizi daha da məsuliyyətli çıxış etməyimizə kömək edir”.

V.Mustafayev öz durumundan da danışıb: “Şükürlər olsun ki, fiziki durumum qaydasındadır, heç bir problem yoxdur. Futbolçunun eyni zamanda psixoloji durumu da yaxşı olmalıdır, bu yöndə də hər şey qaydasındadır. İnşallah, oyuna çıxıb var gücümlə çalışıb komandama kömək edəcəm”.

Pressing.az