"Çox çətin, intensiv oyun oldu. Əsas istəyimiz səfərdə yaxşı nəticə əldə etmək idi ki, buna da nail olduq. Hələ qarşıda bir oyun var. Lakin yolun yarısını qət etmişik".

Bu sözləri Pressing.az-a açıqlamasında UEFA Çempionlar Liqasının üçüncü təsnifat mərhələsinin ilk oyunları çərçivəsində ötən gün Bakıda keçirilən "Qarabağ" - "Ludoqorets" matçından (1:2) sonra Bolqarıstan təmsilçisinin üzvü Edvin Kurtuluş deyib.

24 yaşlı müdafiəçi Bakıda qələbə qazanacaqlarını bildiyini söyləyib:

"Özümüzə inanırdıq. Bakıdakı matçda qələbə qazanacağımızı bilirdim".

O, cavab matçına da ciddi hazırlaşacaqlarını bildirib:

"Hazırda əsas məqsədimiz Çempionlar Liqasında mərhələ adlamaqdır. Evdəki oyunda da özümüzə güvənirik. Cavab matçında nə edəcəyimizi bilirik. Növbəti qarşılaşmaya da çox ciddi hazırlaşacağıq".

Daşqın Əziz