"Sabah" klubu növbəti mövsüm Azərbaycanı UEFA Konfrans Liqasında təmsil edəcək.

Masazır təmsilçisi nüfuzlu turnirin ikinci təsnifat mərhələsində İsrailin "Makkabi"(Hayfa) komandası ilə qarşılaşacaq.

"Bayquşlar"ın ispaniyalı mərkəz müdafiəçisi Con İrasabal Pressing.az-a açıqlamasında bu mərhələdə ən çətin rəqiblə üz-üzə gələcəklərini bildirib:

"Bu mərhələdə mümkün olan ən çətin rəqiblə düşdük. Lakin təslim olmaq olmaz. Rəqibin kimliyindən asılı olmayaraq, meydana çıxıb, var qüvvəmizlə oynamalıyıq. Əsas istəyim Konfrans Liqasının qrup mərhələsinə vəsiqə qazanmaqdır. Ancaq bu haqda danışmaq hələ tezdir. İndi bizi qarşıda "Makkabi" ilə iki vacib oyun gözləyir. İnanıram ki, bu oyunlardan yaxşı nəticə ilə ayrılaraq azarkeşlərimizi sevindirəcəyik".

Bildirək ki, Konfrans Liqasında 2-ci turun oyunları iyulun 25-də və avqustun 1-də keçiriləcək. “Sabah” ilk oyunu səfərdə, cavab görüşünü isə Bakıda keçirəcək.

Daşqın Əziz