Orxan Əliyev: "Qarabağ"la oyunda özümüzü yaxşı tərəfdən göstərməyə çalışacağıq" – AÇIQLAMA

Sabah Azərbaycan Premyer Liqasında yaranmış qış fasiləsi başa çatacaq.

Təlim-məşq toplanışlarını başa vuran elita təmsilçiləri marafona qaldıqları yerdən davam edəcəklər.

Belə ki, 19-cu turun açılış matçı yanvarın 21-də "Sabah"la "Neftçi" arasında keçiriləcək. Digər qarşılaşmalar isə 22, 23 yanvar tarixilərində baş tutacaq.

"Araz-Naxçıvan" turun son günündə "Qarabağ" səfərinə yollanacaq. Naxçıvan təmsilçisinin mərkəz hücumçusu Orxan Əliyev Pressing.az-a açıqlamasında komandasının yaxşı hazırlıq keçdiyini və bu görüşdə layiqli mübarizə aparmağa çalışacaqlarını bildirib:

"Təlim-məşq toplanışımız çox yaxşı keçdi. Komandamız yoxlama oyunlarında qüvvəsini sınadı, çatışmayan cəhətləri müəyyən etdik. Bizi qarşıda "Qarabağ"a qarşı gərgin oyun gözləyir. Bu matçda layiqli mübarizə aparmağa və özümüzü yaxşı tərəfdən göstərməyə çalışacağıq. Komandamızda əhval-ruhiyyə yüksəkdir".

Bildirək ki, yanvarın 23-də keçiriləcək "Qarabağ" - "Araz-Naxçıvan" oyunu saat 19:00-da başlayacaq. Qarşılaşma Tofiq Bəhramov adına Respublika stadionunda keçiriləcək.

Daşqın Əziz