Ötən gün Xankəndidə keçirilən Azərbaycan Kubokunun 1/8 final mərhələsinin "Qarabağ" - MOİK matçından (1:0) Ağdam təmsilçisinin futbolçusu Bəhlul Mustafazadə Pressing.az-ın suallarını cavablandırıb.

Müdafiəçi əvvəlcə görüşlə bağlı fikirlərini bölüşüb:

- Kifayət qədər çətin oyun keçdi. MOİK yaxşı mübarizə apardı, son dəqiqəyə qədər döyüşdü. Onları mübarizələrinə görə təşəkkür edirəm.

- İlk hissədə oyunun alınmamasına səbəb nədir?

- Bu haqda nəsə demək çətindir. Oyuna ciddi hazırlaşmışdıq, amma bəlkə də, süni örtüklü meydançanın da təsirləri oldu.

- Oyunu izləyəndə belə təəssürat yarandı ki, "Qarabağ" sanki MOİK-ə şərait yaradırdı...

- Belə deməzdim. Hiss olunurdu ki, MOİK matça yaxşı hazırlaşıb.

- Komandanı Xankəndidəki ilk oyuna kapitan kimi çıxarmaq necə hissdir?

- Əlbəttə, qürur hissi keçirdim. Kapitanlıq sarğısı haqda çox düşünmürəm. Xankəndidə oynamaq özü şərəfdir.

Daşqın Əziz