Nəriman Axundzadə: "Vurduğum qolu şəhidlərimizə həsr edirəm"

"Qarşılaşma gərgin və maraqlı keçdi. Burada oynamaq xoş idi. Tarixi anlar yaşadıq. Allah şəhidlərimizə rəhmət etsin. Bizə bu tarixi anları yaşamaq üçün şərait yaratdığına görə Ordumuza təşəkkür edirəm".

Pressing.az xəbər verir ki, bu sözləri "Qarabağ"ın futbolçusu Nəriman Axundzadə Azərbaycan kubokunun 1/8 finalında bu gün Xankəndidə MOİK-lə keçirilən oyundan (1:0) sonra jurnalistlərə müsahibəsində deyib.

Matçın 90+5-ci dəqiqəsində hesabı açan gənc hücumçu vurduğu tarixi qol haqda da danışıb: "Çox sevindim. Xoşbəxtəm ki, tarixi oyunda tarixi qolun müəllifi oldum. Bir ay bundan öncə belə düşünürdüm ki, Xankəndidə qol vuracağam. O qolun müəllifi olmaq şərəfdir. Vurduğum qolu şəhidlərimizə həsr edirəm".

Axundzadə yenidən Xankəndidə oynamaq istədiklərini də bildirib: "Burada oynamaq mənim üçün xoş oldu. Bizim üçün əlavə motivasiyadır. Xüsusi hisslər idi. Unudulmaz anlar yaşadıq. Bu torpaqlarda ilk qolu vurmaq mənim üçün unudulmaz olacaq".

Pressing.az