"İkinci Liqanın ilk matçı idi. Səfərdə oynayırdıq. Əvvəlcədən bilirdik ki, çətin olacaq. 2 top fərqi ilə geridə idik. Şükürlər olsun ki, hesabı bərabərləşdirə bildik. Oyunda üstünlük bizdə idi. Təəssüf ki, qol imkankarımdan istifadə edə bilmədik".

Bu sözləri Pressing.az-a açıqlamasında "Şahdağ Qusar"ın futbolçusu Rahid Əmirquliyev deyib. 34 yaşlı yarımmüdafiəçi İkinci Liqanın ilk turu çərçivəsində səfərdə "Ağdaş"la matçdan (2:2) sonra oyunla bağlı fikirlərini bölüşüb:

"Birinci oyun olduğu üçün düşünürəm ki, normaldır. Stadionun ot örtüyündən başqa hər cür şərait var. Futbolun inkişafından danışırıqsa, belə meydançada oynamaq düzgün deyil. Burada bilmirsən rəqibə qarşı oynayasan, yoxsa topu ram edəsən. Çalışacağıq ki, səhvlərimiz üzrəyində işləyib, növbəti matçlarda yaxşı nəticələr əldə edək".

Əmirquliyev İkinci Liqa klubuna keçidi haqda da danışıb:

"Düzdür, karyeramı bitirmişdim. Oynamaq fikrim yox idi. "Şahdağ Qusar" yenidən fəaliyyətə başladı. Mən futbola "Şahdağ"da başlamışam. Baş məşqçi, rəhbərlik xahiş etdi ki, gəl komandanın içində ol, dəstək ol. Mənim üçün doğma klubdur. Ona görə də "yox" deyə bilmədim. Bakıda məşq olanda və oyundan-oyuna komandaya qoşuluram".

Elsevər Muradzadə, Bakı-Ağdaş