"Oyun nə istədiyimiz kimi başladı, nə də bitdi. 6 oyundur qələbə qazanırdıq. İstəyirdik ki, "Qarabağ" səfərindən də yaxşı nəticə ilə qayıdaq. "Qarabağ"dan xal almaq çətindir. Bu dəfə də xal ala bilmədik. Amma məğlub ola biləcəyimizi təxmin etmişdik. Ona görə də üzülmürük, çünki bizi qarşıda finala bərabər 3 üç oyun gözləyir. Məqsədimizə çatmaq üçün əlimizdən gələni edəcəyik. "Qarabağ"a məğlubiyyət bir az ona görə yaxşı oldu ki, 6 oyundur qələbə qazanırdıq. Bu, bəlkə də bizə siqnal oldu. Ki, hardasa bir az rahatlaşmışdıq. "Qarabağ" ilə matçda xal itirmək yaxşıdır, nəinki digər oyunlarda".

Bu sözləri Pressing.az-a açıqlamasında "Qəbələ" klubunun kapitanı Asif Məmmədov deyib. 36 yaşlı futbolçu Azərbaycan Premyer Liqasının 33-cü turunda səfərdə "Qarabağ"a məğlub olduqları oyundan sonra fikirlərini bölüşüb.

Məmmədov, öz performansı barədə də danışıb:

"Özüm az oynadım. Hesab 0:2 olarkən meydana daxil olub, "Qarabağ"a qarşı oynayanda istər-istəməz ümid az olur. Bəlkə bu səbəbdən oyunum yaxşı alınmadı".

"Qəbələ"nin "10 nömrə"si gələcək karyerası haqda isə bunları söyləyib:

"Mövsümün sonunda müqaviləmin müddəti başa çatır. Hələ ki "Qəbələ" və ya digər klublardan real təklif yoxdur. "Qəbələ"də qalacağımı düşünürəm. Gücüm var, karyeramı davam etdirmək istəyirəm".

Elsevər Muradzadə