AFFA-nın baş katibi hakimliklə bağlı qalmaqaldan danışdı - EKSKLÜZİV AÇIQLAMA

"Hakimlərlə bağlı problemlərlə Hakimlər Komitəsi məşğul olur. O cümlədən hakimlərin işinə Hakimlər Komitəsi, hakim-inspektorlar qiymət verir. Oyunlardan sonra hər bir məqam, hər bir verilən qərar detallı şəkildə Hakimlər Komitəsi ilə müzakirə olunur, baxılır. Lazım olduğu təqdirdə, hakimlərlə müxtəlif seminarlar keçirilir, söhbət aparılır. Həm AFFA, həm də PFL rəhbərliyi daim Hakimlər Komitəsi ilə birgə oyunlarda baş verən məsələləri nəzərdə saxlayır. Çalışılır ki, öz tərəfindən də səhv verilən qərarlar üzərində nəticə çıxarılsın. Əgər həqiqətən yalnış qərarlar varsa, gələcəkdə belə yalnış qərarların sayı azalsın".

Bu sözləri Azzərbaycan Premyer Liqasının 32-ci turunda keçirilən "Neftçi" - "Qarabağ" matçından sonra Pressing.az-a eksklüziv açıqlamasında AFFA-nın baş katibi Sərxan Hacıyev deyib.

Funksioner hakimlik və VAR qaydaları ilə bağlı yaxın gələcəkdə idman jurnalistləri üçün seminarların keçirilmə ehtimalının olduğunu da bildirib:

"Bu, çox vacib bir məsələdir. Bu mövsümdən VAR sistemi istifadə edilməyə başladı. Onun da spesifik xüsusiyyətləri, qaydaları var. Ehtimal var ki, media nümayəndələri üçün yaxın gələcəkdə seminarlar keçirilsin. Bunu Hakimlər Komitəsi ilə müzakirə edəcəyik".

Elsevər Muradzadə