Tərlan Quliyev: "Mate qıcıqlandırıcı oyunçudur" - AÇIQLAMA

"Neftçi" ilə oyundan sonra ayağımda yüngül zədə oldu. Buna görə bir həftə məşq etmədim. Məşqlərə başlayandan sonra isə xəstələndim. Bir tur zədəyə, bir tur da xəstəliyə görə oynaya bilmədim. Çempionatın elə dönəmidir ki, heyətdə rotasiyalar olur. Məşqçilərin qərarına hörmətlə yanaşıram. Özümü yaxşı hiss edirəm. Hər an oynamağa hazıram".

Bu sözləri saytımıza açıqlamasında "Kəpəz"ə məğlub olduqları oyundan (0:1) sonra "Turan Tovuz"un futbolçusu Tərlan Quliyev deyib.

O, matçın sonundakı mübahisəyə də toxunub:

"Oyun bitəndən sonra rəqibin futbolçusu Ahmed Ayzaya qeyri-etik hərəkət etdi. Bundan sonra bizim uşaqlar onun üzərinə getdilər. Nəticədə orda çaxnaşma düşdü. Mən uşaq deyiləm, neçə ildir futboldayam. Bilirəm ki, kiməsə əl atsam, qarşımda qırmızı vərəqə görəcəm. "Kəpəz"in futbolçusu Mate Kvirkiya qıcıqlandırıcı hərəkət etdi. Tanıyıram "Kəpəz"in bəzi futbolçularını. Mate qıcıqlandırıcı oyunçudur. Qabağıma çıxdı və toqquşduq. Bundan sonra onun çiynindən tutmaq istəyirdim. Ola bilər ki, bu, bir az bərk alındı. Amma orada rəqibi vurmaq olmayıb. Mate sadəcə, özünü yerə atdı. Həqiqət belədir, artıq nə qərar verəcəklərini bilmirəm".

Elsevər Muradzadə, Qəbələ