Felipe Santos: "Konfrans Liqasında uğurlu olmaqçün yeni transferlərə ehtiyacımız var" – AÇIQLAMA

"Bizim üçün çox vacib oyun idi. Avrokuboklara yollanmaq üçün 3 xala ehtiyacımız vardı. Matça tam konsentrasiya olmuşduq və düşünürəm ki, çox yaxşı mübarizə apardıq. Meydanda 3 xal qazanmaq üçün sonadək vuruşduq. Nəticədə də Avropaya yollanırıq".

Bu sözləri Misli Premyer Liqasının 35-ci turunda keçirilən "Şamaxı" - "Araz-Naxçıvan" oyunundan sonra qonaqların braziliyalı vingeri Felipe Santos Pressing.az-a açıqlamasında deyib.

28 yaşlı "sambaçı" UEFA Konfrans Liqasında mübarizə aparmaq üçün yeni transferlərə ehtiyac olduğunu bildirib:

"Bu, klubumuz üçün tarixi hadisədir. Çünki ilk dəfə avrokuboklarda iştirak edəcəyik. Bu turnirə qatılmaq bizim üçün şərəfdir. Lakin Konfrans Liqasında uğurlu olmaq üçün bizim yeni oyunçulara ehtiyacımız var. Onu da deyim ki, bizi çempionatın son turunda "Zirə"yə qarşı oyun gözləyir. Bu matçdan sonra artıq Konfrans Liqasına konsentrasiya olacağıq".

Santos "Şamaxı" ilə görüşdə zədələnərək əvəzlənməsi və son durumu haqda isə bunları söyləyib:

"Zədəm elə də ciddi deyildi. Lakin baş məşqçidən əvəzlənməyimi istədim. Çünki son turda "Zirə" ilə qarşılaşacağıq və həmin oyunda da iştirak etmək istəyirəm. Hazırda özümü yaxşı hiss edirəm".

Bildirək ki, "Araz-Naxçıvan" – "Zirə" matçı mayın 25-də keçiriləcək.

Daşqın Əziz