"Qarabağ" bu oyunla ÇL-in qrup mərhələsinə əsas namizədlərdən sayılır" – "Linkoln"un baş məşqçisi

"Çətin oyun oldu. Hansı komanda ilə qarşılaşdığımızın fərqində idik. Dünən də bildirmişdim ki, sona qədər mübarizə aparacağıq. Rəqibimiz həddindən artıq güclü idi. Sonadək vuruşduq, amma alınmadı".

Pressing.az xəbər verir ki, bu sözləri Çempionlar Liqasının ikinci təsnifat mərhələsinin cavab oyunları çərçivəsində "Qarabağ"a 0:5 hesabıyla (ümumi hesab - 7:0) məğlub olduqdan sonra "Linkoln"(Cəbəllüttariq) klubunun baş məşqçisi Xavi Munoz deyib.

O, daha sonra jurnalistlərin suallarını cavablandırıb.

- Bugünkü "Qarabağ" Çempionlar Liqasının qrup mərhələsində oynaya bilərmi?

- Dünən də qeyd etmişdim ki, "Qarabağ" çox güclü komandadır. Futbolçular bir-birini çox yaxşı anlayırlar. Stategiyası olan komandadır. Bu oyunla "Qarabağ" ÇL-in qrup mərhələsinə əsas namizədlərdən sayılır. Qarşıda hələ oyunlar var. Lakin bu komanda əsas namizədlərdəndir.

- İmkanınız olsaydı, "Qarabağ"dan hansı futbolçunu transfer edərdiniz?

- Əslində, əlimizdə olan futbolçulardan razıyam. Hər mövqedə güclü oyunçularımız var. Ona görə də "Qarabağ"dan hansısa futbolçu seçmək çox çətindir.