"Səfərdə "Neftçi" ilə oynamaq çətindir. Amma belə oyunlar bizim üçün vacibdir. İnkişaf etməkdən ötrü bu cür rəqiblərlə qarşılaşmalıyıq. Əzmkarlıq sayəsində xal qazandıq. Bilirdik ki, "Neftçi" "Qarabağ"a uduzub deyə bu oyunda qalib gəlmək istəyəcək. Əks-hücumlarda yaxşı epizodlara girdik. Soyuqqanlı olsaydıq, epizodlardan istifadə edə bilərdik. Bizim üçün hər xal önəmlidir. Çempionat daha da gərginləşir. İkinci dövrə daha da mübariz olacaq. Futbolçulara dedim ki, işə davam".


Pressing.az xəbər verir ki, bunu "Turan Tovuz"un baş məşqçisi Ayxan Abbasov Misli Premyer Liqasının 9-cu turunda səfərdə "Neftçi" ilə qolsuz bərabərə qaldıqları oyundan sonra keçirilən mətbuat konfransında deyib.

"Böyük itkilərlə oyuna çıxmışdıq. Runi Eva iki oyun idi ki, zədə ilə oynayırdı. Amma hiss etdik ki, bu, ona gələcəkdə daha pis təsir edər. Ona görə ona istirahət verdik. Şakir Seyidovun qırmızı vərəqəsi var idi. Bu rotasiyalar normaldır. Bu ay 5 oyun oynayacağıq. Hər bir futbolçunu kluba dəvət edəndə onlara şans verəcəyimizi bildirmişdik. Bu gün də bir neçə futbolçuya şans verdik. Məncə, uğurlu çıxış etdilər. Komandada rəqabət olmalıdır. Heyət geniş deyil, amma çalışırıq ki, rəqabət olsun" - deyə o bildirib.

Mütəxəssis "Bakcell Arena"da Ayxan Abbasov müxtəlif klublarda olsa da, uğurlu çıxış edir. Bunun resepti nədir?" sualına belə cavab verib: "Zirə"də, "Sumqayıt"da işləyəndə də, bu cür suallar verilirdi. Özüm də bilmirəm(gülür)".

A.Abbasov ikinci hissədə zədələnən Ehtiram Şahverdiyevin durumu haqda da danışıb: "Başından zərbə aldı. Meydanda qalması riskli idi. İndi durumu ilə maraqlandım. MRT müayinəsindən sonra daha dəqiq bilinəcək. Ümid edirəm ki, ciddi deyil".