"Turan Tovuz"u təhlil etmişdik. Bilirdik ki, Ayxan Abbasovun öz oyun stili var, oyuna hazır idik. Gözləmədiyimiz anda qol buraxdıq. Bu qolun təsirindən ayılmamış ikinci topu qapımızda gördük. Buna baxmayaraq, komanda yaxşı oyun göstərdi. Çempionat yeni başlayıb. Hazırda turnir cədvəlinin heç bir əhəməyyəti yoxdur. Bundan da yaxşı olacağıq. Oyuna görə futbolçularıma təşəkkür edirəm. Sonadək mübarizə apardılar".

Pressing.az xəbər verir ki, bu sözləri "Kəpəz"in baş məşqçisi Azər Məmmədov Azərbaycan Premyer Liqasının 3-cü turunun "Turan Tovuz"la oyunundan sonra keçirilən mətbuat konfransında deyib. O, Gəncə təmsilçisinin məğlubiyyətini şərh edib.

- Qapıçınız kobud səhvlərlə yadda qalır. Bu mövqeyə transfer gözlənilir?

- Məğlubiyyəti kiminsə üstünə atmaq istəmirəm. Futbolda səhvlər də olur, yaxşı anlar da. "Neftçi"ni udanda səhvlər görünmürdü. Razıyam, səhvləri oldu. Amma o da istəməzdi ki, qollar buraxaq. Qapıçı transferi yox, amma başqa mövqelərə gözlənilir.

- Transfer məsələsi nə yerdədir? Razılıq əldə etdiyiniz oyunçular var?

- Nə qədər çətin olsa da, ağlamaq fikrim yoxdur. "Kəpəz"ə gələndə özümə söz vermişəm. Bu şərait və büdcə ilə razılaşmışamsa, axıra kimi əlimdən gələni edəcəm. Hazırkı futbolçularla davam edəcəm. Bəli, çətindir. Çalışacağıq ki, bu istiqamətdə işlər görək.

- Məğlubiyyətə əsas səbəb erkən qol oldu, yoxsa Mate Kvirkviyanın zədələnməsi?

- Mateyə görə çox təəssüflənirəm. Tibbi baxışdan sonra durumu bilinəcək. Oyunu uduzduq, amma futbolçu itirmək bizim üçün çox ağırdır. Oyuna gəlincə, qola kimi futbolçular meydanda istədiklərimi yerinə yetirirdilər. Futbolçulara tapşırmışdım ki, ehtiyatlı oynamaq lazımdır. Belə də başlamışdıq. Gözləmədiyimiz anda qol buraxdıq. Bu da sınma nöqtəsi oldu.

- Hücum xəttinə transfer etmək fikriniz var?

- Bəli, hücumda problemlər var, razıyam. Bu haqda düşünürük. Müdafiə planında isə yaxşıyıq. Hücum oyunuçuların hərəsinin üzərinə düşən iş var. Onlara tapşırmışıq ki, bir az artırmaq lazımdır. Bu baş versə, qollar da gələcək. Getdikcə hər şey yoluna düşəcək. Bir neçə transferlə oyunumuzda yaxşıya doğru dəyişiklik olacaq.