"Hamını eyni anda meydana buraxmaq olmur" – Kurban Berdıyev

"Yaxşı başa düşürük ki, bu gün iki xal itirdik. İlk hissədə ehtiyatlı idik. İkinci hissədə bir qədər yaxşı oynadıq. Amma bir qol çatışmadı".

Pressing.az xəbər verir ki, bu sözləri "Turan Tovuz" klubunun baş məşqçisi Kurban Berdıyev Misli Premyer Liqasının 29-cu turunun "Səbail"lə oyunundan sonra keçirilmiş mətbuat konfransında deyib. O, jurnalistlərin suallarını da cavablandırıb.

- "Turan Tovuz" son 5 oyuna cəmi 2 xal toplayıb. Avrokuboklara yollanmaq nə dərəcədə realdır?

- Bu barədə düşünürük. Oyunçularla da danışırıq. Ümid edirik ki, növbəti oyunlarda daha yaxşı oynayacağıq.

- Oyundan sonra Veysəl Rzayevlə azarkeşlər arasında insident oldu. Bu haqda məlumatlısız?

- Xeyr, məlumatımız yoxdur.

- Tural Bayramlını ümumiyyətlə siyahıdan çıxarmısız? Ona güvəniniz yoxdur?

- Xeyr, rəqabət çox güclüdür. Hamını eyni anda meydana buraxmaq olmur.

- Anton Kraçkovski hansı məqsədlə gətirilib komandaya? Bu gün də oynamadı...

- Xəstə idi. Amma xəstələnməsəydi, onun haqda da düşünürdük.

- Bundan əvvəlki oyunlarda da onu meydanda görmürük. Səbəbi var?

- Bu, elə mövqedir ki, rəqabət yüksəkdir. Özü də legionerdir.

- Qışda gətirilən futbolçular ya oynamır, ya da özlərini yaxşı göstərmir. Məsuliyyəti kimin üzərinə atmaq olar?

- Deməzdim ki, uğursuz transferlərdir. Hurtado və Jo sintetik meydançaya cəld reaksiya verirlər, yaxşı təsir etmir.(sportal.az)