Gəncə futbolunda Mahmud Qurbanov səsi: Veteranlardan çağırış

Gəncənin futbol veteranları “Kəpəz” klubunun baş məşqçi postuna Mahmud Qurbanovun təyin olunmasını istəyirlər.

Pressing.az-a danışan veteranların fikrincə, Qurbanov Gəncədə gənc futbolçuların inkişafına ciddi töhfə verə bilər.

Veteranlar bildirirlər ki, Mahmud Qurbanovun məşqçilik fəaliyyəti dövründə bir sıra gənc futbolçular yetişib və onların peşəkar futbola qazandırılmasında "Professor" ləqəbli mütəxəssisin böyük rolu olub. Xüsusilə, M.Qurbanovun “Neftçi”nin əvəzedici komandasında baş məşqçi işlədiyi illərdə Rza Cəfərov, Əlirza Müştəbazadə, Ağadadaş Salyanski, İsmayıl Zülfüqarlı, Fərid Yusifli, Rüfət Abbasov kimi futbolçuların inkişaf etdiyi vurğulanır.

Gəncəli veteranlar hesab edirlər ki, “Kəpəz”in əsas missiyalarından biri bölgə futboluna xidmət etmək və yerli istedadları üzə çıxarmaqdır.

Onların sözlərinə görə, “Kəpəz” yalnız nəticə qazanan deyil, eyni zamanda, gələcəkdə Premyer Liqa səviyyəsində futbolçular yetişdirən klub olmalıdır. Bu səbəbdən də onlar rəhbərliyin Mahmud Qurbanov variantını ciddi şəkildə nəzərdən keçirməsini istəyirlər.

Pressing.az