"Əlimizdən gələni edəcəyik ki, qalib gələk" – Emin Mahmudov

Azərbaycan millisinin kapitanı Emin Mahmudov sabah Latviya ilə keçiriləcək yoldaşlıq matçından əvvəl mətbuat konfransına qatılıb.

Pressing.az-ın "Misli"nin dəstəyi ilə Latviyaya ezam olunmuş əməkdaşı xəbər verir ki, təcrübəli futbolçu fikirlərini bölüşdükdən sonra jurnalistlərin suallarını cavablandırıb.

- Sabah yaxşı oyun göstərib, qalib gəlməyə çalışacağıq. İnanıram ki, bunu bacaracağıq. Latviya millisi də yaxşı kollektivdir. Əlimizdən gələni edəcəyik ki, qalib gələk.

- Milli komandanın heyətində ilk qolunu Latviya yığmasına vurmusan. Sabah fərqlənsən, 15 qolla yığma tarixinin bombardiri olacaqsan. Bu barədə nə deyə bilərsən?

- Bu barədə düşünmürəm. Daha yaxşı olar ki, komandama kömək etmək barədə düşünüm. Əlbəttə ki, fürsət düşsə, qol vurmağa çalışacağam.

- Səncə, sabah millinin kapitanı və penalti zərbəsini yerinə yetirən oyunçusu kim olacaq?

- Buna millinin baş məşqçisi qərar verəcək.

- Uzun müddətdən sonra milliyə qayıdışınla yenidən komandanın lideri ola biləcəksən?

- Əlbəttə, bunu dərk edirəm. Hər gün öz üzərimdə çalışıram ki, formada qalam və daha çox oynayam.

Qeyd edək ki, sabah Latviyanın paytaxtı Riqadakı "Skonto" stadionunda keçiriləcək Latviya – Azərbaycan matçı saat 17:00-da start götürəcək.

Daşqın Əziz