Ulduzlar Liqası turnirinin mətbuat konfransı keçirilib

Bu gün Bakıda çimərlik futbolu üzrə "Star Cup Azerbaijan" turnirinin təqdimat mərasimi keçirilib.

Pressing.az xəbər verir ki, tədbirdə təşkilatçılarla yanaşı, fəxri qonaq qismində yunan-Roma güləşi üzrə dünya və Avropa çempionu, Olimpiya mükafatçısı Rafiq Hüseynov da iştirak edib.

Konfransı giriş sözü ilə turnirin təşkilatçısı, idman jurnalisti Ağa Dadaşzadə açıb. O, bu turnirin Azərbaycanda ilk dəfə keçiriləcəyini diqqətə çatdırmaqla yanaşı, bunun ölkəmizdə idmanın inkişafına verəfəyi töhfədən, o cümlədən kütləviliyin təmin olunmasındakı rolundan söz açıb.

Daha sonra söz konfransın fəxri iştirakçısı, yarışda mübarizə aparacaq "Platinum" komandasının kapitanı Rafiq Hüseynova verilib. Hüseynov da öz növbəsində turnirin əhəmiyyətindən söz açıb. Pəhləvanımız yarışın idmana marağın artırılması yönündə böyük təkan verəcəyini bildirib.

AFFA və Su İdmanı Sarayının dəstəyi ilə təşkil olunan turnirdə ulduzlardan ibarət 4 komanda mübarizə aparacaq. Görüşlər 26 və 28 iyun tarixlərində keçiriləcək, final isə 2 iyulda baş tutacaq.

Qarşılaşmalar Su İdmanı Sarayının ərazisində yerləşən Avropa Oyunları Parkında oynanılacaq. Oyunlara giriş ödənişsizdir.