Sərbəst güləş üzrə Azərbaycan millisinin üzvü Hacı Əliyev Avropa çempionatının finalına vəsiqə qazanması haqda danışıb.

Pressing.az xəbər verir ki, H.Əliyev bu yarışın 2023-cü ildə onun üçün ikinci turnir olduğunu söyləyib.

"Məşqçilər qərar verdilər ki, dünya çempionatı üçün 65 kq çəki dərəcəsinə keçim. Fikirləşdik ki, Avropa çempionatı və digər turnirlər üçün çəki azaltmaq o qədər də vacib deyil. Düşünürəm, 70 kq-da da yaxşı çıxış edirəm. Rəqiblər fiziki cəhətdən çox güclüdürlər və adətən 4-5 kiloqram çəki salmalı olurlar. Mən texnikaya önəm verərək güləşmək qərarına gəldim".

Qeyd edək ki, xorvatiyanın paytaxtı Zaqrebdə keçirilən Avropa çempionatında 70 kq. çəki dərəcəsində yarışan H.Əliyev finala yüksəlib. O, bu gün keçiriləcək həlledici qarşılaşmada Ramazan Ramazanovla (Bolqarıstan) görüşəcək.

Bu gün, həmçinin, daha 4 sərbəst güləşçimiz isə medal görüşlərinə çıxacaqlar. Əliabbas Rzazadə (57 kq) qızıl medal uğrunda Süleyman Atlı (Türkiyə), Maqomedxan Maqomedov (97 kq) Givi Matçaraşvili (Gürcüstan) ilə qarşılaşacaq. Əli Rəhimzadə (65 kq) təsəlliverici görüşdə Coşua Finesilverlə, Səbuhi Əmiraslanov (79 kq) bürünc medal uğrunda Axsarbek Qulayev / Hetik Çabolov cütünün qalibi ilə üz-üzə gələcək.