Rumıniyanın paytaxtı Buxarestdə güləş üzrə Avropa çempionatı davam edir.

Pressing.az xəbər verir ki, bu gün sərbəst güləşçilər mübarizəyə başlayıblar. İlk gündə Azərbaycan millisinin 5 güləşçisi yarışa qoşulub.

Maqomedxan Maqomedov (97 kq) ardıcıl 3 rəqibinə qalib gəlib və finala vəsiqə qazanıb.

İslam Bazarqanov (57) və Əli Rəhimzadə (65 kq) bürünc medal uğrunda görüşə vəsiqə əldə ediblər.

Həmçinin u gün Azərbaycan güləşçisi Elis Manolova (65 kq) yarışda bürünc medal qazanıb. O, 3-cü yer uğrunda görüşdə Almaniya təmsilçisi Anne Nurnbergeri üstələyib.

Birgül Soltanova (62 kq) isə bürünc mükafat uğrunda dueldən məğlub ayrılıb.

Beləliklə, qadın güləşçilərimiz Avropa çempionatını 3 medalla başa vurublar. Daha əvvəl Mariya Stadnik (50 kq) və Alyona Kolesnik (59 kq) qitə çempionu olublar.

Qeyd edək ki, Azərbaycan millisi daha əvvəl bu çempionatında 8 medal qazanıb. Nihat Məmmədli (60 kq), Murad Məmmədov (63 kq), Həsrət Cəfərov (67 kq), Mariya Stadnik (50 kq) və Alyona Kolesnik (59 kq) qızıl, Rəşad Məmmədov (55 kq), Ülvü Qənizadə (72 kq) gümüş, Beka Kandelaki (130 kq) isə brünüc medala sahib olub.