Dünən Azərbaycan Voleybol Federasiyası son günlər "Xarı Bülbül Şuşa" və "Xarı Bülbül Laçın" komandalarının üzləşdiyi maliyyə çətinliyi ilə bağlı məsələlərə münasibət bildirib.

Qurumun yaydığı açıqlamada bildirilir ki, Azərbaycan milli çempionatlarında təmsil olunan klubları maliyyə resurslarını özləri müəyyən edir və voleybolçularla müqavilələr bağlayaraq hazırlıq proseslərinə başlayırlar.

AVF-in bu açıqlamasına münasibət öyrənməkçün "Xarı Bülbül Laçın" komandasının baş məşqçisi Cavid Süleymanovla əlaqə saxladıq. O, Pressing.az-a açıqlamasında federasiyanın onları əvvəlcə ümidləndirdiyini, sonradan isə müdafiə xarakterli məlumat yaydığını bildirdi:

"Federasiya əvvəlcə bizi ümidləndirdi, sonradan isə müdafiə xarakterli açıqlama yaydı. Baş aça bilmədim ki, nə demək istəyirlər".

Süleymanovun federasiya rəhbərliyi ilə görüşüb-görüşməyəcəkləri ilə bağlı sualımıza cavabı isə belə oldu:

"Bu barədə çox danışmaq istəmirəm. Voleybol ailəsinin içindəyik. Məgər vəziyyətimizi görmürlər?! Hamı durumumuzu bilir".


AVF-in açıqlamasını buradan oxuya bilərsiniz: https://pressing.az

Daşqın Əziz