4 gündən sonra Bakıda "Qarabağ" və "Qalatasaray" klubları arasında xeyriyyə matçı keçiriləcək. Bilet satışından əldə olunan gəlir isə Türkiyədə baş verən dəhşətli zəlzələdən əziyyət çəkən insanlara yardım üçün təqdim olunacaq.

Lakin vəsait təkcə bilet satışından əldə olunmayacaq. Belə ki, teleyayım və reklamlardan qazanılan gəlir də Türkiyə üçün ianə ediləcək.

Bunu Pressing.az-a açıqlamasında "Qarabağ"ın mətbuat katibi Gündüz Abbaszadə deyib.

"Atlılar"ın sözçüsü indidən konkret məbləğ deyə bilməyəcəyini və qarşılaşmadan sonra ictimaiyyətə geniş məlumat veriləcəyini söyləyib:

"İndidən nəsə demək çətindir, ancaq oyundan sonra bilet satışından əldə olunan gəlirləri, eləcə də teleyayım və reklamlardan toplanan vəsaitləri bir-bir, şəffaf şəkildə açıqlayacağıq. Bununla bağlı ictimaiyyətə geniş, hər xırda detalınadək məlumat verəcəyik. İndidən məbləğ nə qədər olacaq, bunu demək çətindir, amma əlimizdən gələni edəcəyik ki, yüksək olsun. Fürsətdən istifadə edib, bu işdə bizə dəstək olan şirkətlərə təşəkkürümüzü bildiririk. O cümlədən bilet alıb oyunu izləyəcək, "Qarabağ"ın səsinə səs verəcək insanlara da minnətdarlığımızı bildiririk".

Abbaszadə, oyun günü stadiona ianə qutularının qoyulmayacağını da dilə gətirib:

"Stadiona ianə qutularının qoyulmasını planlaşdırmırıq. Belə bir düşüncəmiz yoxdur. Biz bunu düzgün hesab etmərik".

Pressing.az