Haitinin futbolçusu: "Azərbaycan millisi çox yaxşı komandadır" – AÇIQLAMA

Azərbaycan millisi ötən gün yoxlama oyunu keçirib. Fernandu Santuşun rəhbərlik etdiyi komanda Haiti yığması ilə üz-üzə gəlib. Oyun qonaqların 3:0 hesablı qələbəsiylə yekunlaşıb.

Matçdan sonra haitililərin sol cinah yarımmüdafiəçisi Ruben Providens Pressing.az-a fikirlərini bölüşüb.

Niderlandın "Almere Siti" klubunda da çıxış edən futbolçu layiqli qələbə qazandıqlarını bildirib:

"Komandamız çox yaxşı mübarizə apardı. Xeyli təhlükəli epizod yaratdıq və bunlardan üçünü qolla tamamladıq. Bu gün qapıçıdan tutmuş, hücumçuyadək çox yaxşı oynadıq. Layiqli qələbə qazandıq. Buna görə xoşbəxtəm".

23 yaşlı oyunçu Azərbaycan millisinin performansı haqda da danışıb:

"Azərbaycan yığması çox yaxşı komandadır. Heyətində kifayət qədər güclü futbolçular var. Bu gün bizə qarşı yaxşı mübarizə apardılar. Lakin qol vura bilmədilər. Biz hesabı açdıqdan sonra rəqib qol vurmaq üçün xeyli əziyyət çəkdi, amma bunu bacara bilmədi".

Qeyd edək ki, Azərbaycan millisi martın 25-də növbəti yoxlama görüşündə Bakıda Belarusla üz-üzə gələcək.

Daşqın Əziz