Azərbaycan milli komandası növbəti yoxlama oyunu keçirib.

Yığmamız Masazırda Belarus seçməsi ilə üz-üzə gəlib. Oyun rəqib komandanın 2:0 hesablı qələbəsiylə yekunlaşıb.

Pressing.az xəbər verir ki, matçdan sonra millimizin baş məşqçisi Fernandu Santuş mətbuat konfransına qatılıb. O, oyunla bağlı fikirlərini bölüşüb:

"İlk hissə hər iki komandanın balanslı oyunu ilə keçdi. İlk 15 dəqiqə əzrində futbolçularımız daha çox müdafiəyəmeyilli oynayırdılar. Onlara başa saldıq ki, irəli atılmaq, futbol oynamaq lazımdır. Bundan sonra irəli atıldılar. Hər iki komanda təhlükəli epizodlar yaratdı. Buna baxmayaraq, iki qol buraxdıq. İkinci yarıya yaxşı başladıq. Xəyal Əliyev mükəmməl oyun nümayiş etdirirdi. Bir müddət sonra Renat Dadaşovu meydana buraxdım ki, topu özümüzdə daha çox saxlayaq. Şahin Şahniyarov da millidə debüt etməsinə baxmayaraq, yaxşı oyun göstərdi. Təəssüflər olsun ki, bəsit səhvlərdən qollar buraxdıq. Bu cür şeylərə görə çox üzülürük. Hesabda geri düşməyimizə baxmayaraq, futbolçular ruhdan düşmədilər. Hiss edirdim ki, qol vura bilərik. Lakin bu alınmadı".