Azərbaycan millisi sabah yoldaşlıq oyunu çərçivəsində Haiti yığması ilə qarşılaşacaq.

Pressing.az xəbər verir ki, Azərbaycan millisinin baş məşqçisi Fernandu Santuşun oyundan bir gün əvvəl mətbuat konfransı keçirilib. Portuqaliyalı çalışdırıcı çox yaxşı hazırlaşdıqlarını bildirib:

“Kim sabah oynayacaq, artıq qərarlaşdırmışam. Qərar artıq verilib. İndidən deyə bilmərəm kimlər oynayacaq. Ümumilikdə, əlimizdə olan oyunçular bizimlə olacaq. Kimlərsə meydanda iştirak edəcək, kimlərsə ehtiyatda qalacaq.

Heç kim sual vermədiyinə görə sabahkı oyun haqda fikirlərimi bölüşmədim. Sual olanda mən ona cavab verirəm. Yaxşı milli komandaya qarşı oynayacağıq. Keyfiyyətli oyunçulara malikdirlər. Rəqibin son beş-altı oyununu izləmişik, təhlilər aparmışıq. İnanıram ki, yaxşı, maraqlı oyun olacaq. Elə bir heyətləri var ki, çalışırlar hücum futbolu oynasınlar. İki hücumçusu var ki, bütün komanda yoldaşları onları axtarmağa çalışırlar. Elə bir heyətdir ki, topu itirdikdə geriyə çəkilmirlər, çalışırlar ki, hücumda pressinq edib topu alsınlar. Əlbəttə ki, müdafiə xəttində problemləri var. Onları burada açıqlamayacam.

Çox yaxşı hazırlaşmışıq. Yaxşı əhval-ruhiyyədəyik. Baxmayaraq ki, sabahkı oyun bizə xal vermir, amma çox istəyirik ki, qələbə qazanaq. Qələbə bizim üçün çox vacibdir. Kollektiv şəkildə çıxış etsək, düşünürəm ki, onları üstələyə bilərik. Oyunçuların fiziki göstəriciləri belədir: bəziləri hündürdür, bəziləri daha cüssəlidir, bəzilərinin boyu balacadır. Bu, futboldur. Futbol daha çox taktika üzərində qurulan bir oyundur.

Novruz bayramı haqqında kifayət qədər məlumatım var. Dünən təamlarından dadmağa imkanım da oldu. Ümumi götürəndə, deyərdim ki, Azərbaycan Avropanın 20 ən yaxşı ölkəsindən biridir. Təhlükəsizlik üst səviyyədədir. Özünüz də görmüş olarsız ki, mən dünən video da çəkib, Azərbaycan xalqını Novruz bayramı münasibəti ilə təbrik etmişəm.

Premyer Liqa oyunlarını yada salsaq, ən çox azarkeşi “Neftçi” – “Qarabağ” oyununda müşahidə etmişik. Yaxşı atmosfer var idi. Səhv eləmirəmsə, doqquz mindən çox tamaşaçı var idi tribunalarda. İstərdik ki, millinin də oyunlarında çoxlu azarkeş olsun. Amma onları da başa düşmək lazımdır ki, qalib gəlməyimizi istəyirlər. Belə olan halda, say baxımından da artım müşahidə ediləcəyini düşünürəm”.

Saat 21:45-də start götürəcək Azərbaycan – Haiti matçı Mehdi Hüseynzadə adına Sumqayıt şəhər stadionunda keçiriləcək.