"MİX"i olmayan "Zirə"

Azərbaycanda futbol camiəsi çox spesifikdir. Onun bir parçası olmaq, ayaqda qalmaq, inkişaf etmək bir az qəlizdir. Klubların böyük əksəriyyətinin idarəetməsində yer alan şəxslərin idman mediasının "şinelindən" çıxmış və ya bizə yaxın olan şəxslər olduğunu nəzərə alsaq, demək olar ki, media ilə olan münasibətlərdə yaxşı empatiya qura bilirlər. Di gəl ki, bəzi klub funksionerləri medianın işinə dəstək vermək əvəzinə mane olurlur.

Bir jurnalist üçün stadionda nə lazımdır?

1. Oturub oyunu izləmək üçün yer
2. Matçın protokolu
3. Yutubda PFL-in rəsmi kanalına baxmaq imkanını yaradacaq internet
4. Oyundan sonra MİX zona.

Hansı ki bunlar Peşəkar Futbol Liqasının Əsasnaməsində də öz əksini tapıb. Birinci, ikinci və üçüncünü hardasa yola vermək olar. Amma dördüncü - MİX zona vacibdir. Bu yoxdursa, türkün məsəli, demək, göstərib vermirsən...

Üçüncü mövsümdür ki, Azərbaycan futbolunun içindəyəm. İndiyədək "Zirə"nin yerli çempionatda nə MİX zona təşkil etdiyini görmüşəm, nə buna görə cəzalandığını...

Ölkə futbolu dövlət dotasiyası hesabına fəaliyyət göstərir. Loru dildə desək, məndən vergi alıb, onu bu sahədə çalışanlara maaş kimi verir. Diqqətli və hörmətli olmaq lazımdır.

Elsevər Muradzadə