Renduliç: "Futbolçular fiziki və psixoloji cəhətdən çox yorğundur"

"Şamaxı"nı bir xala görə təbrik edirəm. Demək olar ki, bu oyunun taleyini birinci hissədə həll etməliydik. Amma ilk hissədə qol buraxdıq. Fasilədən sonra yenə səhvimiz oldu, rəqib də bundan yararlandı. “Şamaxı”nın çərçivəyə iki zərbəsi oldu, onlar da qolla nəticələndi".

Pressing.az xəbər verir ki, bu sözləri “Sabah”ın baş məşqçisi Krunoslav Renduliç Misli Premyer Liqasının 1-ci turunun “Şamaxı” ilə görüşdən (2:2) sonra mətbuat konfransında deyib.

Xorvatiyalı mütəxəssis komandasının çox top itkisinə yol verməsini yorğunluqla əlaqələndirib: "Bir şeyi nəzərə almaq lazımdır ki, “Makkabi” ilə ağır oyun keçirmişdik. Həmin oyun 3 saat çəkdi. Futbolçular fiziki və mental cəhətdən çox yorulmuşdular. Dünyada da belədir, bu tip matçlardan sonra rəqibin kimliyindən asılı olmayaraq, xal itkisi mümkündür. Bəhanə gətirmək istəməzdim. Bu gün üç qırmızı vərəqəyə və zədələrə görə oyunu buraxan futbolçularımız var idi. Oynamayan oyunçular meydana çıxdı. Mən onların performansından da razı qaldım. İlk onbirlikdə birdən-birə 6-7 oyunçu dəyişmək çətindir. Çünki bu qədər oyunçu dəyişikliyi edəndə oyun itir. Amma başqa variantlarımız da yox idi".

Renduliç mövsümün əvvəlində itirilən xalların onlar üçün faciə olmadığını da qeyd edib: "Biz elə danışmayaq ki, sanki mövsüm bitir. Onsuz da hamı xal itirəcək. Hələ ki, mövsümün əvvəlidir. Gələcəyə oyun-oyun yanaşsaq, daha yaxşıdır. Çünki sabah və ya 7 gündən sonra nə baş verəcəyini bilmirik".