Qadın futbolçulardan ibarət Azərbaycan milli komandası Millətlər Liqasında Monteneqronu 3:0 hesabı ilə məğlub edib.

Yığmamızın baş məşqçisi Siyasət Əsgərov qarşılaşmadan sonra Pressing.az saytının suallarını cavablandırıb:

- Qələbə bizim üçün vacib idi. Çünki, Monteneqrodan uzaqlaşacaqdır. İkinci hissənin əvvəlində oyununuzda bir az düşüş oldu. Bilirdik ki, rəqib uzun toplarla gələcək. Onların oyunçuları fiziki baxımdan bizdən üstündür. Önə keçməyimizin səbəbi tempi istədiyimiz kimi saxlaya bilməyimiz idi. Düşünürəm ki, qollar ilk hissə gəlməli idi. Planımız bu idi. Biz ilk hissədə qol vura bilməyəndən sonra rəqibdə özünəinam yarandı.

- Farer adaları ilə uzun səfərdən sonra yorğunluğun olacağını düşünürdünüz?

- 18 saat yolda olmuşuq. Şansımız onda gətirdi ki, rəqib Kiprdən gəlib. Amma komandam çox yorğun idi. Farer adaları ilə oyun da ağır keçmişdi.

- Bu turnirdə komanda məğlub olmayıb. Ab-havanı necə dəyərləndirirsiz?

- A milli komandamız yeni yaranıb. Bundan əvvəl bir dəfə Avropa çempionatının, bir dəfə də dünya çempionatının seçmə mərhələsində oynamışıq. Neçə ildir Millətlər Liqasının yaranmasını gözləyirdik. Çünki, bizdə qadın futbolu yeni yaranıb. Əvvəlki seçmə mərhələlərdə A və B səbətindən çox güclü rəqiblər düşürdü. O ölkələrlə oynamaq bizim üçün çox çətindir. Ona görə böyük hesablar qeydə alınırdı. Avropa çempionatının seçmə mərhələsində 3 xal yığmışdıq, dünya çempionatında isə 7 xal. İnkişaf edirik. Millətlər Liqasında eyni gücdə rəqiblər olduğu üçün bizim kimi komandalar üçün stimuldur. Qızlar burada özlərini sübut edir. Liqa başlayanda qarşımıza qrupdan çıxmaq məqsədi qoymuşduq. Hədəfimiz lider olmaqdır. İki oyununuz qalıb.

- Liderlik şansını necə dəyərləndirirsiz?

- Arxayınlıq olmasın. Lider kimi çıxmaq istəyirik. Komandanı qarşıdakı matçlara kökləyəcəyik. Futbolçuda arxayınlıq olanda baha başa gəlir. İnanıram ki, qızlar əllərinə düşən şansı dəyərləndirərlər. Duninurəm ki, tarix yaza bilərik.

- Millidə hansı problemləri görürsüz?

- Futbolçular klublara qayıdır. Əksəriyyəti ölkə xaricində oynayır. Zədələrdən qorxuram. Əlimizdə bəlli heyət var. Oradan kənara çıxa bilmirik. İstəyirik ki, futbolçular milliyə hazır və zədəsiz gəlsinlər. Digər problem arxayınlıq ola bilər. Farer adaları ilə matçdan sonra arxayınlıq var idi komandada. Biz futbolçulaa danışdıq, iclas keçirdik. Şükürlər olsun ki, qızlar özlərinə gəldilər.

- Bir aylıq fasilə komandanı ritmdən sala bilər?

- İlk oyundan bugünkü oyuna kimi komandada böyük fərq var. Futbolçularımızın əksəriyyəti öz klublarında əsas heyət oyunçusudur. Onlara nəzarət edirik. Düşünmürəm ki, fasilənin təsiri olsun. Bir ay normal vaxtdır.

- Azərbaycanda qadınların liqası hələ başlamayıb. Bu, yerli çempionatda oynayan futbolçuların fiziki durumuna təsir edir?

- Millilərin oyunları olduğu üçün belə qərar verilib ki, liqa gec başlasın.

- Qələbələrə görə mükafat verilir komandaya?

- Təbii ki, olur. Bu gün AFFA prezidenti Rövnəq Abdullayev da oyunu izləyirdi. Onun bura gəlməyi qızlar üçün stimul idi. Yəqin ki, Rövnəq müəllim bu qələbəni və qrup liderliyini dəyərləndirəcək.

- Kapitan çox qol epizodlarını dəyərləndirə bilmədi. Onu necə təsəlli etdiniz?

- Bütün oyunçularım mənim üçün dəyərlidir. Sevinc özü də komanda üçün vacib futbolçudur. Bundan öncəki oyunlarda vurduğu qollar var.

Elsəvər Muradzadə