"Şəfa"nın baş məşqçisi: "Elə məsələlərə önəm vermirəm" – AÇIQLAMA

"Şəfa" ötən gün Azərbaycan 1-ci Liqasının 24-cü turu çərçivəsində autsayder "Şimal"ı qəbul edib. Görüşdə qapılara qol vurulmayıb.

Matçdan sonra Bakı təmsilçisinin baş məşqçisi Elgiz Kərəmli Pressing.az-ın suallarını cavablandırıb.

– Oyunun gedişində, xüsusilə də son dəqiqələrdə əlverişli qol fürsətləriniz oldu, lakin komandanız dəyərləndirə bilmədi. Səbəb nə idi?

– Oyunun belə keçəcəyini gözləyirdik. Çünki rəqib son pillədə qərarlaşıb və bizdən xal almağa çalışırdı. Belə matçlarda rəqib komandalar daha çox müdafiəyə çəkilir və ən azından bir xal qazanmağa səy göstərirlər. Belədə, sıx müdafiə xəttini yarmaq heç də asan deyil. Lakin futbolçularımız xeyli çalışdılar, real qol vəziyyətləri yaratdılar. Amma təəssüf ki, dəyərləndirə bilmədik. Bu, futboldur, belə məqamlar tez-tez olur.

– "Şəfa"nın çempionluq taleyinin növbəti tura qaldığını deyə bilərik?

– Bəli. Bu gün qalib gəlsəydik, çempionluğu qarantiləyə bilərdik. Qismət növbəti turadır. İnşallah, qələbə qazanaraq çempionluğu rəsmiləşdirməyə çalışacağıq.

– Bir müddət əvvəl mətbuatda Aftandil Hacıyevin, bugünlərdə isə Ayxan Abbasovun "Şəfa"nın baş məşqçi postuna gətiriləcəyi ilə bağlı məlumatlar yayılıb. Növbəti dəfə bu məsələyə nə münasibət bildirərdiz?

– Yayılan xəbərdən məlumatlıyam. Lakin bu tip məsələlərə önəm vermirəm. Rəhbərlik tərəfindən daim dəstək görürəm. Bu barədə narazılığım yoxdur.

– Klubun prezidenti Kənan Sadıqlı ilə dialoq zamanı bildirdi ki, "Şəfa" rəhbərliyi komandanın hazırkı baş məşqçisinə güvənir və yola sizinlə davam etmək istəyir...

– Rəhbərliyə bu etimada görə minnətdarlığımı bildirirəm. Hazırda işimə fokuslanmışam və əlimdən gələni edəcəyəm ki, klubumuzun adı yüksəklərdə olsun.

Daşqın Əziz