"Neftçi" klubu Rusiya Premyer Liqası təmsilçisi "Ximki"nin futbolçusu Ayaz Quliyevi transfer etmək niyyətindədir.

Pressing.az xəbər verir ki, Bakı təmsilçisi əslən azərbaycanlı olan oyunçunun transferi ilə bağlı "Ximki" ilə müzakirələr aparır. "Neftçi"nin 26 yaşlı yarımmüdafiəçiyə görə 300 min avro təklif etməyə hazır olduğu vurğulanıb. Ancaq Moskva klubuna hələ rəsmi təklif göndərilməyib.

Xəbərdə futbolçuya Azərbaycan vətəndaşlığı verildiyi də vurğulanıb. Vəziyyətlə tanış olan Bakıdakı mənbənin açıqlamasında bildirilir: "Ayaz Azərbaycan pasportu alıb. “Neftçi” məşqçi dəyişmək haqda düşünür. Hazırkı məşqçinin şəxsi problemləri var. Üstəlik, “Neftçi” bu mövsüm “Qarabağ”dan xeyli geridədir. Transfer daha çox pasportla bağlı vəziyyətdən asılı olacaq”.

Qeyd edək ki, Ayaz Quliyev “Ximki”yə bu ilin iyulunda Tula “Arsenal”ından keçib. O, klubu ilə 2024-cü ilin yayına kimi müqavilə imzalayıb.