"Qarabağ" ötən gün bir neçə futbolçuyla yollarını ayırdığını açıqlayıb.

Bu oyunçulardan biri də Ağdam klubunun əsas üzvlərindən olan Yassin Benziyadır. Əlcəzairli hücumameyilli yarımmüdafiəçiylə avrokuboklar öncəsi yeni müqavilə imzalanmaması futbol ictimaiyyətində təəccüb doğurub.

Benziyanın "köhlən atlar"dan ayrılmasının səbəbi ilə bağlı Pressing.az-a maraqlı informasiya daxil olub.

Belə ki, 30 yaşlı futbolçu "Qarabağ"dan illik 1,5 milyon avro maaş istəyib. Səbəb isə yenidən ağdamlıların sıralarına qoşulan Kadi Borgesdir. Braziliyalının dönüşü komanda daxilində bəzi futbolçuları narazı salıb. Buna səbəb onun illik 1,4 milyon avro maaşa qol çəkməsidir.

Bu səbəbdən digər futbolçular da klubdan bu münasibəti gözləyirlər. Benziyanın da analoji istəyi məhz buna görə olub. Bu tələbi müsbət cavablandırılmayan Əlcəzair millisinin üzvü də kluba güzəşt etməyib və incik şəkildə komandadan ayrılıb.

Qeyd edək ki, "Qarabağ" dünən Yassin Benziya ilə yanaşı, Marko Veşoviç, Patrik Andrade və İsmayıl İbrahimliylə yollarını ayırdığını açıqlayıb.

Pressing.az