Azərbaycan çempionatı başa çatıb

İsmayıllı rayonunda keçirilən çoxgünlük ötüşmələr üzrə Azərbaycan Çempionatına yekun vurulub.

Pressing.az xəbər veror ki, iştirakçılar mövsümün şose velosipedi üzrə sonuncu daxili yarışının 1-ci və 3-cü günlərində qrup ötüşməsi, 2-ci günündə fərdi ötüşmə növü üzrə mübarizə aparıblar.

Ümumi təsnifatda Elit / U23 yaş kateqoriyasında Şahin Eyvazov fəxri kürsünün ən yüksək pilləsinə qalxıb.

Nofəl Nuriyev 2-ci, Əli Qurbanov 3-cü yeri tutub.

Gənclər kateqoriyasında Nihad Xudoyev Azərbaycan çempionu olub. Murad Nadirov və Həsən Zeynalov müvafiq olaraq, 2-3-cü nəticə göstəriblər.

U-17 yaş kateqoriyasında Ümid İsmayılov qızıl, İlkin Sadıqzadə gümüş medal qazanıb. Əli Zeynalzadə bürünclə kifayətlənib.

U-15 yaş kateqoriyasında Emil Abbasov 3 yarış gününün yekununda ən yaxşı nəticə göstərib.

İsmayıl Xankişiyev və Mirəli Miryəhyayev isə ilk üçlüyü tamamlayıblar.