İTV, "Sabah", bir də Balakişi Qasımov

Balakişi Qasımovun rəhbərlik etdiyi "İctimai" TV ilə "Sabah" Futbol Klubu arasındakı əlaqələr ictimaiyyətin diqqətindən kənarda qalmır. Qasımovun iqtisadiyyat naziri, eyni zamanda, Tarif Şurasının rəhbəri Mikayıl Cabbarovla yaxın qohum olması və bu əlaqələrin kluba təsiri tez-tez müzakirə mövzusuna çevrilir. Qasımov özü də mətbuata verdiyi açıqlamalarda "Sabah" klubuna dəstək olduğunu açıq bildirib. Şəhər əfsanələrinə görə, klub qeyri-rəsmi olaraq Balakişi müəllim tərəfindən idarə olunur.

Görünən dağa nə bələdçi – İTV-nin Masazır təmsilçisinə xüsusi diqqət yetirdiyi də aşkardır. Kanal tez-tez klubun PR işlərini aparır, məsələn, "Milyonların şousu" verilişində klub haqqında suallar verilir, İTV-nin yayımladığı "Körpü" serialında "Sabah" fanatları ön plana çəkilir, o cümlədən canlı efirlərdə futbol matçları zamanı hədiyyəli müsabiqələr və s. təşkil olunur. Hər həftə yayımlanan "Bol idman" verilişində də "Sabah"ın matçlarına daha çox yer ayrılır. Bu yanaşma təsadüfi deyil və AFFA rəhbərliyindəki şəxslərin də propaqandası üçündür. Məlumunuz, Balakişi Qasımov həm də AFFA-nın vitse prezidentidir. Lakin bunun üçün arqument gətirib, sübut etməyə çalışmayacağam. Bəlkə də öz həqiqətləri var...

Maraqlıdır ki, dövlət büdcəsindən maliyyələşən "İctimai" TV-də idman departamentinin direktoru və "Bol idman" verilişinin aparıcısının, eyni zamanda, "Sabah"ın futbol və basketbol komandalarında çalışması, verilişin obyektivliyi ilə bağlı şübhələr yaradır. Bu, peşəkar media etikasına zidd bir durumdur və İTV-ni tərəfsiz və müstəqil yayım prinsiplərindən uzaqlaşdırır. Bu cür əlaqələr medianın etibarlılığını zəiflədir və izləyicilərin inamına kölgə salır.

Balakişi müəllimin təbirincə desək, "Hər kəsin kanalı" devizini dəyişdirib sanki. Kanal bir qrup "rusdilli"nin maraqlarına xidmət edir, deyəsən.

Mənbə: Sportliqa.az