"Qarabağ"ın ən önəmli personalarından olan Qurban Qurbanovla klubun funksionerləri arasında soyuq küləklər əsir.

Səbəb isə Qurbanovun yenidən AFFA İcraiyyə Komitəsinə üzv seçilməsidir. Əlbəttə, bu, gözlənilən idi. Lakin klub daxilində tam fərqli proseslər baş verirmiş. Belə ki, onun mart ayında İK-ə namizədlər sırasında yer almağı Ağdam təmsilçisinin rəhbərliyinin ürəyindən olmayıb.

Sən demə, "Qarabağ"ın başbilənləri İcraiyyə Komitəsinə üzvlüyə göz dikibmiş. Qurbanovun isə onlarla məsləhətləşmədən AFFA İK-ə namizəd olması klubun rəhbər heyətini məyus edib.

Bu, Aysberqin görünən tərəfidir. Sizə hələ "Qarabağ" rəhbərliyinin Azərbaycan Respublikası Gənclər və İdman Nazirliyi ilə əlbir olub atdığı addımlardan da danışaq. Bildiyiniz kimi, ötən ay Azərbaycanda iqlim dəyişikliyi ilə bağlı çox önəmli beynəlxalq konfrans keçirildi. Deməli, AGİN-in qeyri-rəsmi şəkildə himayə etdiyi "Qarabağ" rəhbərliyi qurumla birgə konfrans çərçivəsində layihə reallaşdırdı. Tanınmış futbol adamları Bakıya gətirildi. Halbuki bununla bağlı AFFA rəbərliyində təmsil olunan şəxslərlə məsləhət edilməmişdi. Xatırlayırsınızsa, həmin ərəfədə Azərbaycan millisinin UEFA Millətlər Liqası çərçivəsində Qəbələdə Estoniya ilə oyunu keçirilirdi. Uğursuzluq zolağında olan yığmamız turnirin D liqasına yuvarlanmağın bir addımlığında idi. Lakin belə bir məqamda nazirliyin dəyirmanına su tökən "Qarabağ" rəhbərliyi özbaşına qərar qəbul edərək konfransda iştirak etdi. Konfrans zamanı birlik nümayiş etdirən tərəflər əllərində olan rıçaqlarla onu sübut etməyə, görüntü yaratmağa cəhd etdilər ki, sanki onlar işləyir, AFFA rəhbərliyi isə yox.

Baş məşqçi ilə klubun funksionerləri arasında suların bulanmasını sezmək üçün bəzi nüanslar da var. Deməli, "Komanda.az" saytının hər ilin sonunda ənənəvi olaraq keçirdiyi "İlin ən yaxşı baş məşqçisi" sorğusundan sonra qalib mütəxəssisin mükafatlandırılması mərasimində "Qarabağ" rəhbərliyindən bir nəfər də iştirak etməyib.

Demək olar ki, Qurbanovun mart ayındakı addımı funksionerləri ona qarşı çevirib.

Bundan əlavə, Qurban Qurbanovun bu ada layiq görülməsi ilə bağlı paylaşım klubun sosial media hesablarında bir gün sonra edilib.

Çılpaq gözlə görünən odur ki, "Qarabağ"ın uğurlarının memarı ilə rəhbərlik arasında soyuq küləklər əsməkdə davam edir.

Mənbə: Sportliqa.az