Azərbaycan futbol tarixinə adını əbədi yazdırmış mərhum mütəxəssis Böyükağa Hacıyevin oğlu Rüstəm Sports.az saytına müraciət edib.

O, "Neftçi" rəhbərliyinin atasının ruhuna hörmətsizliyindən şikayətlənib.

Tariximizdə ilk dəfə avrokuboklarda qrup mərhələsinə vəsiqə qazanmış "Neftçi"nin baş məşqçisi haqda ARB-də efirə getmiş "O üz" verilişi TV-nin rəsmi "Youtube" kanalında da paylaşılıb.

Rüstəmin sözlərinə görə, bir gün sonra veriliş platformadan müəmmalı şəkildə silinib. ARB-dən ona "Neftçi" rəhbərliyinin istəyi ilə bu addımı atdıqları bildirilib.

Kiçik Hacıyev bunu atasının ruhuna qarşı hörmətsizlik sayır. Dediyinə görə, səbəb verilişdə Mahir Şükürovla birgə "Neftçi" rəhbərliyini tənqid etmələridi.

Sports.az məsələ ilə bağlı "Neftçi"nin və ARB-nin mövqeyini öyrənib.

"ARB Media Qrupu"nun mətbuat katibi Mayıl Əsgərov sorğumuza cavabında verilişin "Youtube" kanalından silinmədiyini bildirib.

"Neftçi" PFK-nın mətbuat katibi Emin Əfəndi isə Sports.az saytına açıqlamasında bu məsələdən məlumatsız olduqlarını, bir futbol klubunun hər hansı televiziya kanalına tapşırıq vermək səlahiyyətinin olmadığını deyib.

Qeyd edək ki, Rüstəmin qardaşı Yusif sosial şəbəkədə paylaşım edərək "Neftçi" rəhbərliyinin Böyükağa Hacıyevin ölüsündən qorxmasına işarə vurub.