Adı Macarıstanın "Ferentsvaroş" klubu ilə hallanan "Qarabağ"ın yarımmüdafiəçisi Julio Romao bununla bağlı qərarını verib.

Pressing.az-a daxil olan informasiyaya görə, braziliyalı futbolçu mövsümün sonuna qədər Ağdam təmsilçisinin sıralarını tərk etməyəcək.

25 yaşlı "sambaçı" bu barədə qəti qərarını baş məşqçi Qurban Qurbanova bildirib. Romao ona edilən təklifləri hazırda dəyərləndirmək niyyətində olmadığını bəyan edib.

Səbəblərdən biri isə braziliyalının ata olmağa hazırlaşmasıdır. Belə ki, yaxın həftələrdə övlad sahibi olacağı gözlənilən futbolçu diqqətini ailəsinə və "Qarabağ"a cəmləmək üçün bu addımı atıb.

O, "Ferentsvaroş" da daxil olmaqla digər təklifləri hələ ki "dondurub".

Qeyd edək ki, oyunçunun "köhlən atlar"la 2026-cı ilin 30 iyununadək müqaviləsi mövcuddur.

Daşqın Əziz