Xəbər verdiyimiz kimi, ötən gün Azərbaycan Premyer Liqasınaın 18-ci turunda keçirilən "Turan Tovuz" - "Araz-Naxçıvan" oyunu yarımçıq dayandırılıb.

Buna qarşılaşmanın ikinci yarısında güclü külək səbəbindən işıq dirəyinin qırılaraq meydançaya düşməsi olub.

Pressing.az-a danışan matçın şərhçisi Ramiz Mirzəzadə həmin anlar haqda bunları deyib:

"Oyunun ikinci hissəsinin ortalarında küləyin sürəti artmağa başladı. Müşahidə edirdim ki, üzü "Araz-Naxçıvan"ın qapısına ötürmələr sürətli gedir. Rejissorumuz da bir neçə dəfə dirəyin tərpəndiyini efirdə nümayiş etdirdi. Külək kifayət qədər sürətlənmişdi. Deyərdim ki, qasırğa kimi bir şey idi. Hətta küləyin təsirindən şərhçi otağı da tərpənirdi. Otağın pəncərəsinin əncaməsi də qopmuşdu. Şoka düşmüşdüm, ilk dəfə idi ki, belə bir hadisənin canlı şahidi olurdum. Şükürlər olsun ki, hadisə nəticəsində xəsarət alan olmadı. İnanıram ki, "Turan Tovuz" rəhbərliyi bu problemi aradan qaldıracaq. Çünki onlar Tovuzda futbol adına çox işlər görürlər. Bu səbəbdən onları həvəsdən salımaq yox, daha keyfiyyətli iş görmələri üçün dəstək olmaq lazımdır".

Bildirək ki, oyun bu gün saat 12:00-da qaldığı yerdən davam edəcək. Yarımçıq dayandırılan matçda "Turan Tovuz" 2:1 hesabıyla qalib gəlib.

Daşqın Əziz