"Qarabağ" çətinlik çəkəcək" – AÇIQLAMA

"Qarabağ" UEFA Avropa Liqasının qrup mərhələsində sonuncu oyununa çıxacaq.

Ağdam təmsilçisi son raundda qrupun autsayderi "Hekken"lə (İsveç) münasibətlərə aydınlıq gətirəcək. Hazırda E qrupunda 7 xala malik "Qarabağ" və "Molde" (Norveç) ikinci, üçüncü yerləri bölüşürlər.

"Köhlən atlar"ın "pley-off"a vəsiqə qazanmaq şansı daha real görünür. Çünki "Molde" son turda qrup lideri, hazırda nəinki Almaniya, Avropanın ən güclü kollektivlərindən biri olan Leverkuzen "Bayer"i ilə qarşılaşacaq.

Bu görüşlə bağlı fikirlərini öyrənmək üçün tanınmış futbol eksperti Ceyhun Sultanova müraciət etdik. O, Pressing.az-a açıqlamasında bu görüşdə təmsilçimizin təzyiq altında olacağını bildirdi:

"Qarabağ" üçün heç də asan oyun olmayacaq. Ağdam təmsilçisi çətinlik çəkəcək. Mövcud durumu nəzərə alsaq, "Qarabağ" bu qarşılaşmadan mütləq qələbə ilə ayrılmalıdır və matç boyu təmsilçimiz təzyiq altında olacaq. Lakin "Qarabağ" öz oyununu oynasa, "Hekken"i məğlub edə bilər"".

Xatırladaq ki, dekabrın 14-də keçiriləcək "Qarabağ" - "Hekken" oyunu saat 21:45-də başlayacaq.

Daşqın Əziz