Xəbər lenti

"Qarabağ" klubunda ayrılıq yaşanıb.

Pressing.az-ın əldə etdiyi məlumata görə, 2021-ci ilin avqustundan Ağdam təmsilçisində adı olub, özü olmayan Qaspar Panadero ilə müqaviləyə xitam verilib.

25 yaşlı ispaniyalının sözləşməsi vaxtından əvvəl ləğv olunub. Belə ki, "Qarabağ" rəhbərliyi klubla 2024-cü ilin 30 iyununadək sövdələşməsi olan Panaderoya "qapını göstərib".

Bildirək ki, sözügedən oyunçunun adı yerli mətbuatda tez-tez qabardılırdı. "Qarabağ" forması ilə meydanda görünməyən yarımmüdafiəçiyə hər ay yüksək məvacib ödənilməsi "atlılar"ın azarkeşləri tərəfindən qınağa tuş gəlirdi.

Qaspar, ümumiyyətlə, əsas komandanın məşq və oyunlarında gözə dəymirdi. “Qarabağ-2” ilə məşq etdiyi deyilsə də, o, əvəzedici komandada da oynamırdı.