Rəşad Sadıqov: "Avrokubok üçün əlimizdən gələni edəcəyik"

Misli Premyer Liqasının 24-cü turu çərçivəsində “Zirə" "Qarabağ"a 1:3 hesabı ilə məğlub olub.

Pressing.az xəbər verir ki, "Zirə" klubunun baş məşqçisi Rəşad Sadıqov oyundan sonra oyun barədə fikirlərini bölüşüb:

"Matç bizim üçün uğurlu başladı, bir neçə təhlükəli hücum qura bildik. Lakin birinci hissənin ortalarında rəqib hesabda irəli çıxdı və bundan sonra oyunumuzda müəyyən eniş yaşandı. Həmin dəqiqələrdə "Qarabağ" daha üstün idi. İkinci hissədə hesab 0:2 olduqdan sonra vəziyyəti dəyişmək çətinləşdi. Etdiyimiz əvəzetmələr müsbət effekt verdi və hesabı 1:2-yə çatdırdıq. Düşünürdük ki, basqını artırıb bərabərlik qolunu vura bilərik, lakin rəqib əks-hücumda üçüncü qolu vuraraq oyunun taleyini həll etdi. Bu gün meydanda kifayət qədər güclü "Qarabağ" var idi. Futbolçularım əllərindən gələni etdilər, sona qədər əzmkarlıq göstərdilər. Ən azından bir xal qazanmaq istəyirdik. Bu cür "Qarabağ"a qarşı uğur qazanmaq üçün gərək hər şey sənin üçün uğurlu alınsın. "Qarabağ" sıx qrafikdə idi. Son turda da ustalıq göstərdilər ki, bütün fikirləri çempionatdadır".