Daha bir bölgə klubu Bakıda məskunlaşacaq – ÖZƏL

Azərbaycan ll Liqasında mübarizə aparacaq "Şəki Siti" klubu ev oyunlarını müvəqqəti olaraq Bakıda keçirəcək.

Pressing.az-a daxil olan informasiyaya görə, şimal-qərb təmsilçisi Şəki şəhər stadionunun təmirə bağlanmasıyla əlaqədar rəqiblərini paytaxtda qəbul etməli olacaq.

Bu, yanvar ayına qədər davam edəcək.

Stadion hazır olduqdan sonra isə şəkililər yenidən doğma meydanda oynayacaqlar.

Qeyd edək ki, ll Liqaya hazırlığını davam etdirən "Şəki Siti" bugünlərdə Qəbələ şəhər stadionunda Küveytin "Əl-Yarmuk" klubu ilə yoxlama oyunu keçirib və 0:2 hesabıyla məğlub olub.

Onu da əlavə edək ki, bu yaxınlarda Şəki təmsilçisinin rəhbərliyi tərəfindən azarkeşləri sevindirəcək addım atılacaq. Bu barədə məlumat tezliklə saytımızda dərc olunacaq.

Pressing.az