"İmişli" "Sumqayıt"ın əvəzedicilərini də uda bilmirsə...

Növbəti mövsüm Azərbaycan Premyer Liqasında iştirak etmək hüququna yiyələnən "İmişli" daha bir yoxlama oyunu keçirib.

Bölgə təmsilçisi "Sumqayıt"ın əvəzedici komandası ilə qarşılaşıb və matçda qapılara qol vurulmayıb.

Yenə "Sumqayıt"ın əsas komandası olsa dərd yarı, imişlililər gənclərin (!) qapısına yol tapa bilməyib. Ev oyunlarını keçirməyə stadionu, məşqlər üçün ayrıca forması olmayan komandanın bu nəticəyə imza atması da gözlənilən idi. Deyə bilərsiniz ki, yoxlama oyunudur, nəticə önəmli deyil. Amma, heyətini legionerlərlə gücləndirən, elitada çıxış edəcək "İmişli" adına bu rəqiblə dueldə nəticə vacibdən də vacib olmalıdır.

Ümumiyyətlə, bu klub ətrafında söz-söhbətlər, mövcud problemlər bitmək-tükənmək bilmir. Bir müddət əvvəl bu vəziyyətdə Portuqaliyadan baş məşqçi (Xorxe Kaskilya) də gətirən əyalət klubu söz-söhbətləri daha da alovlandırmışdı.

İndi də "xirtdəyə qədər" problem içində olan "İmişli"nin bu durumda Premyer Liqadakı çıxışı böyük maraq doğurur.

Pressing.az