Bir neçə gün öncə "Qarabağ"dan ayrılan Patrik Andradenin "Neftçi" ilə anlaşdığı barədə xəbər vermişdik.

Fəqət bu keçid baş tutmayacaq. 32 yaşlı mərkəz yarımmüdafiəçisi "flaqman"la danışıqlardan son anda imtina edib.

Məsələ ilə bağlı Pressing.az-a yeni informasiya daxil olub.

Belə ki, kabo-verdeli oyunçu Azərbaycanı UEFA Konfrans Liqasında təmsil etmək hüququna yiyələnən "Araz-Naxçıvan"a keçməyə razılaşıb.

Patrikin "Neftçi"dən imtina etməsinə əsas səbəb Muxtar Respublika təmsilçisinin daha çox imza pulu verməsi olub. O, naxçıvanlıların aylıq 35 min dollarlıq maaş təklifindən üz çevirməyib.

Andradeyə Bakının mərkəzində kirayə ev və gəzintisi üçün avtomobil də veriləcək.

Müqavilənin şərti isə 1+1 illik olacaq.

Qeyd edək ki, sözügedən futbolçuyla "Zirə" də maraqlanırdı. Lakin Andrade qəsəbə klubu ilə danışıqlar masasına oturmağa maraq göstərməyib.

Pressing.az